ഇന്ത്യയിലെ ആദ്യ വനിതാ ഡി.ജി.പി കാഞ്ചന്‍ ചൗധരി അന്തരിച്ചു
ദില്ലി: ഇന്ത്യയിലെ ആദ്യ വനിതാ ഡി.ജി.പി കാഞ്ചന്‍ ചൗധരി ഭട്ടാചാര്യ (72) അന്തരിച്ചു. അസുഖബാധിതയായിരുന്ന ഇവര്‍ ദീര്‍ഘനാളായി മുംബൈയിലെ ആശുപത്രിയില്‍ ചികിത്സയിലായിരുന്നു. ഇന്ത്യയുടെ ആദ്യ വനിതാ ഡിജിപിയായി സേവനം അനുഷ്ഠിച്ചിട്ടുള്ള കാഞ്ചന്‍ ചൗധരി 2004-ലാണ് ഡിജിപിയായി നിയമിക്കപ്പെട്ടത്. ഉത്തരാഖണ്ഡ് ഡിജിപിയായാണ് നിയമിതയായത്. കിരണ്‍ ബേദിക്ക് ശേഷം നിയമിക്കപ്പെട്ട രാജ്യത്തെ രണ്ടാമത്തെ ഐ.പി.എസ് ഉദ്യോഗസ്ഥ കൂടിയാണ് കാഞ്ചന്‍ ചൗധരി.
സ്ത്രീകള്‍ക്ക് വേണ്ടി വാദിക്കുകയും സ്ത്രീസമത്വത്തെക്കുറിച്ച് സംസാരിക്കുകയും ചെയ്തിരുന്ന കാഞ്ചന്‍ ചൗധരി രാഷ്ട്രീയത്തിലും അല്പകാലം പ്രവര്‍ത്തിച്ചിരുന്നു. പൊലീസില്‍ നിന്ന് വിരമിച്ച ശേഷം 2014-ലെ ലോക്‌സഭാ തെരഞ്ഞെടുപ്പില്‍ കാഞ്ചന്‍ ചൗധരി ആം ആദ്മി സ്ഥാനാര്‍ത്ഥിയായി മത്സരിച്ചിരുന്നു. എന്നാല്‍, തെരഞ്ഞെടുപ്പില്‍ വിജയിക്കാനായില്ല.
വിശിഷ്ടസേവനത്തിന് 1997-ല്‍ രാഷ്ട്രപതിയുടെ പൊലീസ് മെഡല്‍ കാഞ്ചന്‍ ചൗധരിക്ക് ലഭിച്ചിരുന്നു. രാജീവ് ഗാന്ധി പുരസ്‌കാരവും നേടിയിട്ടുണ്ട്.
Comments are closed.