DCBOOKS
Malayalam News Literature Website

‘ബി.വി ദോഷി’; ഇന്ത്യന്‍ വാസ്തുവിദ്യയുടെ കുലപതി

തിരുവനന്തപുരം: വാസ്തുവിദ്യാരംഗത്തെ നൊബേല്‍ എന്നറിയപ്പെടുന്ന പ്രിറ്റ്‌സ്‌കര്‍ പുരസ്‌കാരം കരസ്ഥമാക്കിയ വിഖ്യാത ആര്‍ക്കിടെക്ട് ബാലകൃഷ്ണ വിതാല്‍ദാസ് ദോഷി എന്ന ബി.വി ദോഷി സ്‌പേസസ് ഫെസ്റ്റ് 2019-ന്റെ വേദിയിലെത്തുന്നു. അന്താരാഷ്ട്രവാസ്തുവിദ്യാരംഗത്തെ ആധുനികപ്രവണതകള്‍ പ്രാദേശിക ചേരുവയോടെ അവതരിപ്പിച്ച ദോഷി വാസ്തുവിദ്യാരംഗത്ത് തെക്കന്‍ ഏഷ്യന്‍ മേഖലയിലെ പ്രധാന വ്യക്തിത്വമാണ്. പൂനെ സ്വദേശിയായ ബി.വി ദോഷി സ്വാതന്ത്ര്യാനന്തര ഇന്ത്യയിലെ ഏറ്റവുമധികം സ്വാധീനിക്കപ്പെട്ട ആര്‍ക്കിടെക്ട് കൂടിയാണ്.

ചെലവു കുറഞ്ഞ പാര്‍പ്പിട നിര്‍മ്മാണ രൂപകല്പനയിലൂടെ ശ്രദ്ധേയനായ ബി.വി ദോഷിയുടെ നിര്‍മ്മിതികള്‍ ഏറെ പ്രശംസകള്‍ നേടിയിട്ടുണ്ട്. ബംഗളൂരുവിലെ ഇന്ത്യന്‍ ഇന്‍സ്റ്റിറ്റ്യൂട്ട് ഓഫ് മാനേജ്‌മെന്റ്, ദില്ലിയിലെ നാഷണല്‍ ഇന്‍സ്റ്റിറ്റ്യൂട്ട് ഓഫ് ഫാഷന്‍ ടെക്‌നോളജി, ഇന്‍ഡോറിലെ ചെലവുകുറഞ്ഞ കെട്ടിടസമുച്ചയമായ അരണ്യ, അഹമ്മദാബാദിലെ ഹുസൈന്‍ദോഷി തുടങ്ങിയ നിര്‍മ്മിതികള്‍ ഏറെ ശ്രദ്ധേയമാണ്. അംദാവാദ് നി ഗുഫ എന്ന പേരില്‍ അദ്ദേഹം നിര്‍മ്മിച്ച ഭൂഗര്‍ഭ അറ മ്യൂസിയം എം.എഫ് ഹുസൈനുമായി ചേര്‍ന്നാണ് രൂപകല്പന ചെയ്തിരിക്കുന്നത്.

രാജ്യത്ത് വാസ്തുവിദ്യാപഠനമേഖല നവീകരിക്കുന്നതിലും ദോഷി നിര്‍ണായക പങ്കുവഹിച്ചിട്ടുണ്ട്. പത്മശ്രീ പുരസ്‌കാരം, ആഗാഖാന്‍ പുരസ്‌കാരം, കലാമികവിനുള്ള ഫ്രാന്‍സിന്റെ പരമോന്നത പുരസ്‌കാരം തുടങ്ങി നിരവധി അംഗീകാരങ്ങള്‍ അദ്ദേഹത്തെ തേടിയെത്തിയിട്ടുണ്ട്.

ഇന്ത്യന്‍ വാസ്തുവിദ്യക്ക് നിരവധി സംഭാവനകള്‍ നല്‍കിയിട്ടുള്ള ബി.വി ദോഷിയാണ് സ്‌പേസസ് 2019-ന്റെ മുഖ്യ ആകര്‍ഷണം. ഡി സി കിഴക്കെമുറി ഫൗണ്ടേഷന്റെയും ഡി സി സ്‌കൂള്‍ ഓഫ് ആര്‍ക്കിടെക്ചര്‍ ആന്‍ഡ് ഡിസൈന്റെയും സംയുക്താഭിമുഖ്യത്തില്‍ സംഘടിപ്പിക്കുന്ന ഈ മേള ഓഗസ്റ്റ് 29 മുതല്‍ സെപ്റ്റംബര്‍ 1 വരെ തിരുവനന്തപുരം കനകക്കുന്ന് കൊട്ടാരത്തിലാണ് അരങ്ങേറുന്നത്.

സ്‌പേസസ് ഫെസ്റ്റ് 2019-ല്‍ പങ്കെടുക്കാന്‍ താത്പര്യമുള്ളവര്‍ രജിസ്‌ട്രേഷനായി സന്ദര്‍ശിക്കുക

കൂടുതല്‍ വിവരങ്ങള്‍ക്കായി സന്ദര്‍ശിക്കാം

Comments are closed.