വിഷു എന്ന പെൺകുട്ടി (Vishu Enna Penkutti)

രജത് ആർ. എഴുതിയ വിഷു എന്ന പെൺകുട്ടി എന്ന നോവൽ ഒരു പ്രണയകഥയാണ്. നാല് ക്രൈം ത്രില്ലർ നോവലുകൾക്കുശേഷം രജത് ആർ. എഴുതുന്ന പ്രണയ നോവലാണ് ഇത്.

അന്ന് കോഴ്‌സ് തീരുന്നതിന് മുമ്പുള്ള അവസാന ദിവസത്തെ ഐ.സി.യു. ഡ്യൂട്ടി ആയിരുന്നു ഡോ. ആദിത്യന്. ഉത്സാഹത്തോടെ അയാൾ റൗണ്ട്‌സ് എടുത്തു. മരുന്നുകളുടെ അളവ് ക്രമീകരിച്ചു. ഡ്രിപ്പുകളുടെ വേഗത കൂട്ടിയും കുറച്ചും രോഗികൾക്കിടയിൽ ഓടിനടന്നു. കാൽനൂറ്റാണ്ടിലധികം നീണ്ട ചിട്ടയായ പഠനം. ഇന്ന് എല്ലാത്തിനോടും വിട പറയുകയാണ് അയാൾ… ആഘോഷിക്കാനായി ആദിത്യൻ ഏറ്റവും പുതിയ സിനിമയ്ക്ക് ടിക്കറ്റ് ബുക്ക് ചെയ്ത് എട്ടുമണിയാവാൻ ആകാംക്ഷയോടെ കാത്തിരുന്നു. അതുകഴിഞ്ഞ് ഡോ. സംഗീതിനാണ് നൈറ്റ് ഡ്യൂട്ടി. ആശുപത്രിയിലെ കൂറ്റൻ ക്ലോക്ക് എട്ടടിച്ചു. പക്ഷേ, സംഗീത് മാത്രം എത്തിയില്ല. ഒമ്പത് മണിവരെ കാത്തിരുന്നിട്ടും സംഗീത് എത്താതിരുന്നതുകൊണ്ട് അവന്റെ സ്ഥിരം പരിപാടിയാണെന്ന് കരുതി എന്തെങ്കിലും ആവശ്യമുണ്ടായാൽ സംഗീതിനെ ഫോൺ ചെയ്യാനേൽപ്പിച്ച് ആദിത്യൻ സിനിമയ്ക്ക് പോയി. എന്നാൽ സിനിമ കഴിഞ്ഞിറങ്ങിയ ആദിത്യൻ അറിയുന്നത് ഐ. സി.യു പേഷ്യന്റായ സഹീർ മരിച്ചെന്നും അപ്പോൾ ഡ്യൂട്ടിയിൽ ആരുമുണ്ടായിരുന്നില്ല എന്നുമാണ്. തുടർന്ന് ആദിത്യന്റെ ജീവിതത്തിൽ നടക്കുന്ന സംഭവങ്ങളാണ് ആദിത്യനെ ഒരു നല്ല മനുഷ്യനും നല്ല ഡോക്ടറുമെല്ലാമാക്കി മാറ്റുന്നത്. ആദിത്യന്റെ ഉള്ളിൽ പ്രണയം നിറയ്ക്കുന്നത്.

രോഗങ്ങളെക്കുറിച്ച് എത്രയേറെ പഠിച്ചാലും വേദനയെയും സമയത്തെയും അളക്കാൻ ശ്രമിച്ചാലും ഒരു മനുഷ്യന് മറ്റൊരു മനുഷ്യനെ ലഭിക്കുകയോ നഷ്ടപ്പെടുകയോ ചെയ്യുന്ന നിമിഷത്തെ ഒരിക്കലും കൃത്യമായി പഠിക്കാനാവില്ല എന്ന തോന്നലിൽ നിന്നാണ് രജത് ആർ. വിഷു എന്ന പെൺകുട്ടി എന്ന നോവൽ എഴുതിയത്. അതുകൊണ്ട് തന്നെ ഇത് ഒരു പ്രണയകഥ മാത്രമല്ല; നഷ്ടത്തെക്കുറിച്ചും സ്മരണയെക്കുറിച്ചും മനുഷ്യന്റെ പരിമിതികളെക്കുറിച്ചും അതിജീവനത്തെക്കുറിച്ചുമുള്ള കഥ കൂടിയാണ്. അങ്ങനെയൊരു വായന നമ്മളെ കൂടുതൽ ആവേശത്തോടെ ജീവിക്കാനും പ്രണയിക്കാനും കുറച്ചെങ്കിലും പ്രേരിപ്പിച്ചേക്കാം.