താരി (Thari)

അമാനുഷികശക്തികൾ നമ്മുടെ ജീവിതത്തിൽ ഇടപെട്ടു തുടങ്ങിയാലോ? നിയമം കൈകാര്യം ചെയ്യുന്നവർ പോലും കാര്യങ്ങളുടെ സത്യാവസ്ഥ അറിഞ്ഞു കഴിയുമ്പോൾ നിസ്സഹായരായിത്തീരുന്ന അവസ്ഥ. കേരളത്തിലെ നെല്ലിപ്പാടം എന്ന ദുരൂഹഗ്രാമത്തിലെ ഒരു പെൺകുട്ടിയുടെ പ്രതികാരകഥയാണ് താരി. വർഷങ്ങൾക്കുമുൻപ് ഒരു സർപ്പക്കാവും പഴയ മനയും കൊള്ളയടിക്കാൻ വന്ന ചിലർ അവിടുത്തെ നാഗങ്ങളെയും തമ്പുരാട്ടിയായ തിരുതേയിയെയും നശിപ്പിക്കുകയും ചെയ്യുന്നു. ഈ കഥകൾ കേട്ടു വളർന്ന താരി എന്ന പെൺകുട്ടി സർപ്പക്കാവ് പരിപാലിക്കാൻ തുടങ്ങുന്നു. പിന്നീട് താരിയുടെ ദുരൂഹമരണവും സംഭവിക്കുന്നു. വർഷങ്ങൾക്കുശേഷം കൊലപാതകങ്ങൾ തുടർക്കഥയാകുമ്പോൾ സബ് ഇൻസ്പെക്ടറായ രാധാകൃഷ്ണനും കൂടെ രണ്ടു പോലീസുകാരും പ്രതിയെ കണ്ടുപിടിക്കാനായി ഇറങ്ങിത്തിരിക്കുന്നു. എന്നാൽ അവരെ കാത്തിരിക്കുന്നത് വിചിത്രമായ അനുഭവങ്ങളാണ്.

വളരെ എളുപ്പത്തിൽ കഥയിലേക്ക് ഊളിയിട്ട് ഇറങ്ങാവുന്ന നിരവധി സന്ദർഭങ്ങൾ താരിയിലുണ്ട്. ആകാംക്ഷ നിലനിർത്തുന്ന ആഖ്യാനരീതി, വൈവിധ്യമുള്ള കഥാപാത്രങ്ങൾ, വ്യത്യസ്തമായ അവതരണം എന്നിവ താരി എന്ന നോവലിനെ വേറിട്ടുനിർത്തുന്നു. ഹൊറർ-ത്രില്ലർ ജോണറിൽ ഉൾപ്പെട്ട പുസ്തകങ്ങൾ വായിക്കാൻ ഇഷ്ടപ്പെടുന്നവർക്ക് തീർച്ചയായും തിരഞ്ഞെടുക്കാവുന്ന ഒരു നോവലാണ് താരി. അപ്രതീക്ഷിത ട്വിസ്റ്റുകളും ആകസ്മിക സംഭവങ്ങളും നിറഞ്ഞ ഈ നോവൽ വളരെ ലളിതവും അതേസമയംതന്നെ ത്രില്ലിങ്ങുമാണ്. വായനക്കാരനെ പിടിച്ചിരുത്തുന്ന ധാരാളം ഘടകങ്ങൾ അടങ്ങിയ പുസ്തകമാണ് താരി.