നിഴൽനിറങ്ങൾ (Nizhal Nirangal)

സ്വന്തം മേൽവിലാസങ്ങളും ഭൂതകാലത്തിൻ്റെ നീറുന്ന ഓർമ്മകളും ഉപേക്ഷിച്ച്, അനിശ്ചിതത്വത്തിൻ്റെ വഴികളിലൂടെ മടിക്കേരിയുടെ മടിത്തട്ടിലേക്ക് പലായനം ചെയ്ത അമൃതലത എന്ന സ്ത്രീയുടെ അതിജീവനകഥയാണ് ‘നിഴൽ നിറങ്ങൾ’. വിധി കൊടിയ വേനലിലേക്ക് മാത്രമാണ് വിരൽ ചൂടുന്നതെന്ന തിരിച്ചറിവുണ്ടായപ്പോൾ സ്വന്തം മനസാക്ഷിയുടെ കയ്യും പിടിച്ചു ഇരുണ്ട ഭയത്തിൽ നിന്നും ഏതോ ഒരു സ്വാതന്ത്ര്യത്തിലേക്ക് നടന്നടുക്കുകയായിരുന്നു. ആ യാത്ര അവസാനിച്ചത് മടിക്കേരിയിലെ കാപ്പിത്തോട്ടങ്ങൾക്കിടയിലാണ്. ചീരമ്മ എന്ന വൃദ്ധയുടെയും ഡേവിഡ് എന്ന സാമൂഹ്യപ്രവർത്തകൻ്റെയും തണലിൽ അവൾ തനിക്ക് പുതിയൊരു അസ്തിത്വം കണ്ടെത്താൻ ശ്രമിക്കുന്നു.

തൊഴിലാളികളുടെ അവകാശങ്ങൾക്കും, ഈ മലയോര മേഖലയിലെ ഇരുണ്ട വ്യവസ്ഥകൾക്കുമെതിരെ പൊരുതുന്ന ഡേവിഡും, ഭർത്താവിൻ്റെ മരണശേഷം സമൂഹത്തിൽ നിന്ന് ക്രൂരമായ അനുഭവങ്ങൾ നേരിട്ട വസുന്ധരയും ലതയുടെ ജീവിതത്തിൽ നിർണ്ണായക പങ്കുവഹിക്കുന്നുണ്ട്. ഒരേസമയം വ്യക്തിപരമായ ആത്മസംഘർഷങ്ങളും സാമൂഹിക പ്രതിബദ്ധതയും ഇഴചേരുന്ന നോവലിൽ,സമൂഹത്തിൽ സ്ത്രീ നേരിടുന്ന നിസ്സഹായതകളും, പ്രണയത്തിൻ്റെയും വഞ്ചനയുടെയും കയ്പേറിയ അനുഭവങ്ങളും പറഞ്ഞു വെക്കുന്നു.

ആരുമില്ലാത്ത മുറിയിൽ തനിയെ ഇരിക്കുമ്പോൾ
അകലെ എവിടെയോ ഒരു കതക് പാതി ചാരി വെച്ചതുപോലെ,
തുറന്നിട്ടാൽ ആരുമവിടെയില്ലെന്നറിയാമായിരുന്നിട്ടും
തുറക്കാതിരിക്കാൻ കഴിയാത്തൊരു ഭ്രമം പോലെ,
നിരർത്ഥമായൊരു കാത്തിരിപ്പിൻ്റെയും നഷ്ടബോധത്തിൻ്റെയും ഭ്രാന്തിൻ്റെയും മുൾമുനയിൽ നിൽക്കുന്ന ലതയുടെ വികാരഭരിതമായ യാത്രയും,
ആത്മസംഘർഷങ്ങളും വായനക്കാർക്ക് തീർത്തും ഉൾക്കൊള്ളാൻ കഴിയുന്ന ഒന്നാണ്. മനുഷ്യബന്ധങ്ങളുടെ സങ്കീർണ്ണതയും, അതിജീവനത്തിൻ്റെ കരുത്തും വരച്ചുകാട്ടുന്ന ഈ നോവൽ സ്ത്രീമനസ്സിൻ്റെ ഉൾക്കാഴ്ചകളിലേക്ക് നമ്മെ കൊണ്ടു പോകുമെന്ന് തീർച്ചയാണ്.