കാസർകോഡ് ആഖ്യാനങ്ങൾ (Kasaragod Akhyanangal)

പൊസങ്കടി ഒരു അന്വേഷണറിപ്പോർട്ട്, മഹല്ല്, കിതാബ് മഹൽ, ബഷീർ ദ മാൻ തുടങ്ങി നിരവധി പുസ്തകങ്ങൾ രചിച്ച എം എ റഹ്‌മാന്റെ അടുത്ത മികച്ച രചനയാണ് കാസർകോഡ് ആഖ്യാനങ്ങൾ. ഏകവിളത്തോട്ടങ്ങളെന്ന വികലമായ കാർഷികനയം നിർബന്ധപൂർവ്വം നടപ്പിലാക്കിയതിലൂടെ എങ്ങനെ കാസർകോടിന്റെ പരിസ്ഥിതിയെ ആകെ തകർത്തു എന്ന് കാര്യകാരണ സഹിതം ഉദാഹരണങ്ങളോടെ എം. എ. റഹ്മാൻ ഈ പുസ്തകത്തിൽ പ്രതിപാദിക്കുന്നു. ‘കാഞ്ഞിരദേശത്തിന്റെ ആത്മകഥ, എന്റെയും’ എന്ന മൂന്നാം അധ്യായത്തിൽ ഇപ്രകാരം പറയുന്നു: ‘ഏഴ് ഭാഷകൾ സംസാരിക്കുന്ന, പരമ്പരാഗതമായ തൊഴിൽ ചെയ്യുന്ന ഇത്രയധികം വംശീയ ഗോത്രസമൂഹങ്ങളെ കാസർകോട് അല്ലാതെ കേരളത്തിലെ മറ്റു ജില്ലകളിൽ കാണുക പ്രയാസമാണ്.’കുമ്പള കലാപം പോലുള്ള കലാപങ്ങൾ, പൊട്ടൻ തെയ്യം, തെക്കുനിന്നും വടക്കുനിന്നും വന്ന മലയാള–കന്നഡ ഭാഷാധിനിവേശങ്ങളാൽ പുറകിലേക്കുപോയ തുളുഭാഷയിൽ എഴുതിയ തുളു ഭാഗവതം, ചരിത്രപരമായി കാസർകോടിന്റെ ആധുനികത വിളിച്ചോതുന്ന ആദൂർ ക്ഷേത്രത്തിലെ പുരാതന തുളു ലിപികൾ, വിശ്വകർമ്മജർ പണിതീർത്ത മാവുങ്കാലിലെ ക്ഷേത്രം, തീയ സമൂഹത്തിന്റെ വേട്ടജീവിതത്തിന് അറുതി വരുത്തി അവരെ കാർഷികവൃത്തിയിലേക്ക് നയിച്ച തീയ സമൂഹനായകൻ, തമ്പുരാനെ ധിക്കരിക്കാൻ തന്റേടമുണ്ടായ വയനാടൻ കുലവൻ, കുമ്പള കലാപത്തിന്റെ തുടർച്ചപോലെ സംഭവിച്ച കയ്യൂർ–കരിവെള്ളൂർ കർഷക സമരങ്ങൾ, മുനയൻകുന്ന്–തോൽവിരക് സമരങ്ങൾ, കാടകം വനസത്യാഗ്രഹം, കൂടലിലെ ദ്വൈതാദ്വൈത സംവാദം, ടിപ്പുവിന്റെയും ശിവജിയുടെയും അകമ്പടിയായ് വന്ന വിവിധ ഭാഷക്കാരുടെ സംഗമം, മുസ്ലിം–ബ്യാരി വ്യാപാരസമൂഹത്തിന്റെ ഉത്ഭവം, പോർച്ചുഗീസുകാരുടെ ഗോവയിലെ പീഡനങ്ങളിൽ നിന്ന് രക്ഷപ്പെട്ടെത്തിയ ഗൗഢ സാരസ്വത ബ്രാഹ്മണരെ ചുറ്റിപ്പറ്റി വളർന്ന പ്രത്യേക സംസ്കാരം, കിഴക്കൻ മലയോരത്തെ ആദിവാസി–ഗോത്രവർഗങ്ങളുടെ ആവാസവ്യവസ്ഥകളും സംസ്കാരവും, മൊഗ്രാൽ പാട്ടുകൂട്ടവും മുസ്ലിംകളുടെ പക്ഷിപ്പാട്ടിന്റെ യക്ഷഗാന ദൃശ്യാവിഷ്കരണം, തെയ്യം, യക്ഷഗാനം, പൂരക്കളി തുടങ്ങി കാസർകോടിന്റെ ആധുനികതയുടെ അനേകം ചരിത്രമുദ്രകൾ പ്രൊഫ. എം. എ. റഹ്മാൻ ഈ പുസ്തകത്തിൽ വിവരിക്കുന്നു.