ആയുസ്സിൻ്റെ പുസ്തകത്തിൽ എഴുതിയത് (Ayussinte Pusthakathil Ezhuthiyathu)

സി.വി. ബാലകൃഷ്ണന്റെ പ്രശസ്ത നോവലായ ആയുസ്സിൻ്റെ പുസ്തകം സംബന്ധിച്ച് പ്രമുഖ എഴുത്തുകാരും നിരൂപകരും എഴുതിയ 24 പഠനലേഖനങ്ങളുടെ സമാഹാരമാണ് ആയുസ്സിൻ്റെ പുസ്തകത്തിൽ എഴുതിയത്.

വിശുദ്ധ വേദപുസ്തകവും ദേവാലയവും പള്ളിമണി മുഴക്കവും ഏകാകികളായ മനുഷ്യരുടെ വിഹ്വലസ്വപ്നങ്ങളും പശ്ചാത്തലമാക്കി എഴുതപ്പെട്ട സി.വി. ബാലകൃഷ്ണൻ്റെ ആയുസ്സിൻ്റെ പുസ്തകം എന്ന നോവൽ മലയാളവായനക്കാരെ സംബന്ധിച്ചിടത്തോളം ഗൃഹാതുരമുണർത്തുന്ന ഒരു കൃതിയാണ്. ആ നോവലിനെ പല രീതിയിൽ വിലയിരുത്തുന്ന കൃതി എന്ന നിലയിൽ എ.വി. പവിത്രൻ എഡിറ്റ് ചെയ്ത പുസ്തകം പ്രസക്തമാവുന്നുണ്ട്.

വടക്കെ മലബാറിലെ ഒരു കുടിയേറ്റ ഗ്രാമവും അവിടത്തെ സാധാരണക്കാരായ കുറേ മനുഷ്യരുടെ വൈകാരികവും വൈയക്തികവുമായ പ്രശ്നസങ്കീർണതകളാണ് സി.വി. ബാലകഷ്ണൻ നോവലിൽ അനാവരണംചെയ്യുന്നത്. എന്നാൽ സക്കറിയ, കെ.ആർ. മീര, ഇ.വി. രാമകൃഷ്ണൻ, ഇ.പി. രാജഗോപാലൻ അടക്കമുള്ള ലേഖകർ ആയുസ്സിൻ്റെ പുസ്തകം വിഭാവനംചെയ്യുന്ന വ്യക്തി,സമൂഹം, സദാചാര മൂല്യങ്ങൾ, നിസ്വ കാമനകൾ, ഹിംസകൾ എന്നിങ്ങനെ ജീവിതത്തെ തൊട്ടുനിൽക്കുന്ന പലേതരം അനുഭവങ്ങളേയും ഇഴകീറി പരിശോധിക്കുകയാണിതിൽ.

സക്കറിയ, കെ.ആർ. മീര, സുഭാഷ് ചന്ദ്രൻ, ഇ.വി. രാമകൃഷ്ണൻ, ആഷാ മേനോൻ, എസ്. ശാരദക്കുട്ടി, എൻ. ശശിധരൻ, സന്തോഷ് ഏച്ചിക്കാനം തുടങ്ങിയ പ്രമുഖ എഴുത്തുകാരുടെയും നിരൂപകരുടെയും ലേഖനങ്ങളാണ് ഉൾപ്പെടുത്തിയിരിക്കുന്നത്.

ഈ പഠനസമാഹാരത്തിൻ്റെ എഡിറ്റർ എ.വി. പവിത്രൻ ആണ്.