ശലഭമനുഷ്യൻ (Shalabhamanushyan)

കേന്ദ്രകഥാപാത്രങ്ങളായ രഘുനന്ദൻ്റെയും വേദാന്തികയുടെയും ജീവിതത്തിലൂടെ, അവരുടെ സ്വപ്നങ്ങളുടെയും ആഗ്രഹങ്ങളുടെയും ഓരം ചേർന്നു നടക്കുമ്പോൾ നാം നമ്മളെ തന്നെയാണു കാണുക. കുഞ്ഞുനാൾ മുതൽ നാം കാണുന്ന സ്വപ്നങ്ങൾ. നമ്മുടെ ആഗ്രഹങ്ങൾ, പൂർത്തികരിക്കുമെന്നു കരുതുന്ന പ്രതീക്ഷകൾ. നമ്മുടെ കൊച്ചു പ്രണയങ്ങൾ. അതിലേക്കു കാലുവച്ചു മുന്നേറുമ്പോൾ കാലം മുൻപിൽ കാത്തുവയ്ക്കുന്നത് എന്താകും? എവിടെയാകും ഒടുവിൽ നാം ചിറകടിച്ച് എത്തുക.

ജീവിക്കാൻ നമ്മെ പ്രേരിപ്പിക്കുന്ന സ്വപ്നങ്ങളും പ്രതീക്ഷകളും സ്വന്തമാക്കാൻ സാധിക്കുമോ, സാധിച്ചാൽ തന്നെ ഏതുവിധം? ശലഭമനുഷ്യൻ പങ്കിടുന്ന ആശയങ്ങൾ ഹൃദയാർജ്ജവും തന്നെയാണ്.

ലാർവയായും പുഴുവായും ഇലകളിലിഴയും. പിന്നീടൊരു കുഞ്ഞുചിറകിൻ കരുത്തിൽ പറക്കും. മഴവിൽ വർണങ്ങളിൽ മേളിച്ചും തേൻനുകർന്നും രസിക്കും. ഒടുവിൽ ചിറകറ്റുവീണും നാം ജീവിക്കുന്നു–ശലഭങ്ങളെപ്പോലെ. ഋതുഭേദങ്ങളും വസന്തങ്ങളും ആഘോഷിക്കുന്നു.

സന്തോഷം നുകർന്നു മുന്നേറുമ്പോഴും തീരാത്തൊരു ദാഹം എനിക്കും നിങ്ങൾക്കുമുണ്ട്. ആത്മാവിൻ്റെ ഉള്ളറകളിലെ തമോഗർത്ത നിഴലുകൾ. കാരണം ഞാനും നിങ്ങളും ശലഭമനുഷ്യരാണ്. ഈ സമസ്യയിലേക്കാണു നോവലിസ്റ്റ് മനോഹരങ്ങളായ വാചകങ്ങളും കഥാസന്ദർഭങ്ങളും ഒരുക്കി നമ്മെ കൊണ്ടുപോകുന്നത്.

ഏതോ കടൽത്തീരത്ത് അല്ലെങ്കിൽ കുന്നിൽചെരുവിൽ അജ്ഞാതരായ ചിലരുടെ കൈവിരലുകളിൽ കോർത്തിട്ട നൂലുകളിലെ പട്ടമായിരുന്നല്ലോ ഞാനെന്ന തിരിച്ചറിവ്. പരിമിതികളുടെ നൂൽദൂരം പിന്നിലേക്കു കോർത്തുപിടിക്കുമ്പോഴും മോഹിപ്പിക്കുന്ന ആകാശം മുൻപിൽ ബാക്കി. ആ തിരിച്ചറിവിൽ എത്തിച്ചേരുമ്പോഴും പിന്നെയും കൊതിപ്പിച്ചു പ്രണയവും ചിറകടിക്കാൻ ആകാശവും അവശേഷിക്കുന്നു മുൻപിൽ.

മരണവും ഒരു പ്രണയമാണെന്നും സ്നേഹത്തിൽ മരിക്കുന്നവർ അമരന്മാരാകുന്നതും വീണ്ടും ശലഭങ്ങളായി പറക്കുന്നതും നാം തിരിച്ചറിയുന്നു.

മനോഹരങ്ങളായ കഥാസന്ദർഭങ്ങളും കവിതതുളുമ്പുന്ന നിരവധി വാചകങ്ങളും ചേർത്താണു ശലഭമനുഷ്യൻ എഴുതപ്പെട്ടിരിക്കുന്നത്. രാത്രിക്കും പകലിനും നിലാവിനും പുതിയ അർത്ഥങ്ങളും നിർവചനങ്ങളും നാം കണ്ടെത്തും. വായിച്ചുതീരുമ്പോൾ നേരിയൊരു തിരിച്ചറിവ്. ഈ മണ്ണിൽനിന്ന് ചേലുള്ള പൂക്കൾ പറക്കുന്നത് എന്തുകൊണ്ടെന്ന ഉള്ളറിവ്. മണ്ണിൽ മൊട്ടിട്ട് ആകാശത്തു വളർന്ന് ഒടുവിൽ മണ്ണിലേക്കു തന്നെ വിലയം കൊള്ളുന്ന മനുഷ്യനും അവൻ്റെ പ്രണയവും ഒരിക്കലും അവസാനിക്കില്ലെന്ന വേർതിരിവ്. അതാണു ശലഭമനുഷ്യൻ്റെ കാതൽ – അല്ല ചിറകുകൾ.

പുതുകാല നോവൽ സങ്കൽപ്പങ്ങളെ അടുത്തറിയാൻ നിർബന്ധമായും വായിച്ചിരിക്കേണ്ട രചനയാണ് ശലഭമനുഷ്യൻ.