ഓഫ് ദ് റെക്കോർഡ് (Off The Record)

മിസ്സിങ് കേസുകളിൽ പലപ്പോഴും ആദ്യം നടക്കുന്നത് പ്രാഥമിക വിവരശേഖരണവും അനൗദ്യോഗിക അന്വേഷണവുമാണ്. ഈ ഘട്ടത്തിൽ ലഭ്യമായ വിവരങ്ങൾ പരിശോധിക്കുകയും ബന്ധപ്പെട്ടവരിൽ നിന്ന് വിശദാംശങ്ങൾ ശേഖരിക്കുകയും ചെയ്യുന്നു. ചില സാഹചര്യങ്ങളിൽ ഈ അന്വേഷണത്തിനിടെ തന്നെ കാണാതായ വ്യക്തിയെ കണ്ടെത്താൻ കഴിയാറുണ്ട്. അങ്ങനെ സംഭവിച്ചാൽ കേസ് ഔദ്യോഗികമായി രജിസ്റ്റർ ചെയ്യേണ്ട സാഹചര്യം ഉണ്ടാകണമെന്നില്ല. എന്നാൽ അന്വേഷണം തുടരേണ്ടതായി വന്നാൽ മാത്രമാണ് തുടർനടപടികൾ ഔദ്യോഗികമായി രേഖപ്പെടുത്തി മുന്നോട്ടുപോകുന്നത്.

തികച്ചും വ്യത്യസ്തമായ രണ്ട് മിസ്സിങ് കേസുകളാണ് “ഓഫ് ദ് റെക്കോർഡ്” രണ്ട് അധ്യായങ്ങളിലായി പറഞ്ഞു വയ്ക്കുന്നത്. 

തുടർച്ചയായ ഇടവേളകളിൽ ആറ് പെൺകുട്ടികൾ ക്രൂരമായി കൊലചെയ്യപ്പെട്ട വാർത്ത പുറത്ത് വരുന്നതോട് കൂടിയാണ് ഒന്നാമത്തെ അധ്യായം ആരംഭിക്കുന്നത്. ഇരയും വേട്ടക്കാരനും തമ്മിലുള്ള സംഘർഷമാണ് ഒന്നാം അധ്യായത്തിൻ്റെ കേന്ദ്ര പ്രമേയം.

രണ്ടാം അധ്യായത്തിലേക്ക് വരുമ്പോൾ ഒരു പെൺകുട്ടി മരണപ്പെടുന്നതിന് പിന്നാലെ അവളുടെ ഒരു സുഹൃത്തിനെ കാണാതാവുകയും തുടർന്ന് മറ്റൊരു മരണം സംഭവിക്കുകയും ചെയ്യുന്നു. രണ്ട് മരണങ്ങളുടെയും അസ്വാഭാവികത അന്വേഷണത്തെ മറ്റൊരു തലത്തിലേക്ക് കൊണ്ടുപോകുന്നു. ഒരു മനുഷ്യൻ ജീവിക്കുന്നതോ കാണാതാവുന്നതോ മറ്റുള്ളവർ അറിയുന്നില്ല എങ്കിൽ എന്താണ് സംഭവിക്കുക? 

ഇത്തരം ചില ചോദ്യങ്ങൾ ഓരോ ഘട്ടത്തിലും കേസ് കൂടുതൽ സങ്കീർണ്ണമാക്കുന്നുണ്ട്.

“കാണാതാവുന്നത് മനുഷ്യർ മാത്രമല്ല, ചില സത്യങ്ങളും കൂടിയാണ്.” എന്ന യാഥാർത്ഥ്യത്തിലൂന്നിയാണ് നോവൽ പുരോഗമിക്കുന്നത്.