ത്രയംബകനാഥൻ (Thrayambakanathan)

 പ്രകൃതിയുടെ വശ്യസൗന്ദര്യം വഴിഞ്ഞൊഴുകുന്ന ഇടുക്കിയുടെ മലനിരകൾക്കിടയിൽ മാദകഗന്ധം പൊഴിച്ചു നിറയെ പൂത്തു നിൽക്കുന്ന കാപ്പിത്തോട്ടത്തിനു നടുവിലെ മൊട്ടക്കുന്നിലേക്ക്, അടിക്കാടുകൾ വകഞ്ഞു മാറ്റി ഉന്മാദ നൃത്തം ചവിട്ടുവാനെത്തുന്ന കാളത്തലയന്മാരുടെ കാലുകളുടെ താളത്തിനൊപ്പം നിങ്ങളുടെ കണ്ണുകൾ ഒരിക്കലെങ്കിലും ചലിച്ചിട്ടുണ്ടെങ്കിൽ മനസ്സിൽ ‘ത്രയംബകനാഥൻ്റെ’ ഓർമ്മകളുണരാതെ ഇനിയൊരിക്കൽക്കൂടി ഇടുക്കിയിലൂടെ സഞ്ചരിക്കാൻ നിങ്ങൾക്കാവില്ല.

ടാക്സി ഡ്രൈവറായിരിരുന്ന അച്ഛൻ്റെ തിരോധാനത്തിൽ പോലീസിൻ്റെ അന്വേഷണം വഴിമുട്ടുന്നിടത്ത് അച്ഛനെയന്വേഷിച്ചിറങ്ങുന്ന രണ്ടു പെൺകുട്ടികൾ. അവരിലൊരാളുടെ ക്രൂരമായ കൊലപാതകവും അവളുടെ മൃതദേഹം അടക്കം ചെയ്യുന്ന സമയത്തുണ്ടാകുന്ന അപ്രതീക്ഷിത സംഭവങ്ങളും ഒരു നാടിനെത്തന്നെ നടുക്കം കൊള്ളിക്കുന്ന കുറ്റകൃത്യ പരമ്പരകളുടെ തുടക്കം മാത്രമായിരുന്നു.

വർഷങ്ങളോളം മണ്ണിനടിയിൽ കിടന്നിട്ടും അല്പം പോലും അഴുകിപ്പോകാത്ത ഒരു കൈപ്പത്തിയുടെ ഉറവിടം തേടി ദേവദത്തനും സഹപ്രവർത്തകരും ഒന്നാം ത്രയംബകത്തിൻ്റെ പിന്നാമ്പുറങ്ങൾ ഉഴുതുമറിക്കാൻ തുടങ്ങുമ്പോൾ അവർക്കറിയില്ലായിരുന്നു, പ്രകൃതിയുടെയും മനുഷ്യൻ്റെയും ഓരോ നേർത്ത ചലനങ്ങളും ഒരു നോട്ടം കൊണ്ടു നിയന്ത്രിക്കാൻ കഴിവുള്ള ഗന്ധർവ്വസൗന്ദര്യരൂപീയായ ത്രയംബകനാഥൻ രണ്ടാം ത്രയംബകത്തിൽ അവർക്കായി കാത്തിരിപ്പുണ്ടെന്ന്. ആ നിമിഷം മുതൽ മൂന്നാം ത്രയംബകത്തിൻ്റെ അവസാനത്തെ വാതിൽത്തുറന്നു പുറത്തിറങ്ങും വരെ ദേവദത്തനും ഹിമയ്ക്കുമൊപ്പം ത്രയംബകനാഥൻ്റെ മായാവലയത്തിൽ തന്നെയാവും വായനക്കാരും.

പ്രണയവും തിരസ്കാരവും, പകയും, കുറ്റകൃത്യങ്ങളും അന്വേഷണവും ശക്തമായ ഒരു കഥതന്തുവിൽ കൃത്യമായി ചേർത്തു വച്ച ഒരു മിസ്റ്ററി ത്രില്ലറാണ് ത്രയംബകനാഥൻ.