അന്ധകാരം മാനവപർവ്വം (Andhakaram Manavaparvam)

ശ്രീ പത്മനാഭസ്വാമിക്ഷേത്രത്തിലെ എ നിലവറ തുറന്നതിനുശേഷം ഏവരും ഉറ്റുനോക്കുന്നത് കോടികൾ വിലമതിക്കുന്ന സ്വർണ്ണനാണയങ്ങളും രത്നങ്ങളും നിറഞ്ഞ ബി നിലവറയെയാണ്. നാഗബന്ധനം ചെയ്ത ബി നിലവറയ്ക്കുള്ളിൽ നിധിശേഖരം മാത്രമല്ല, മഹാരഹസ്യങ്ങളും ഒളിഞ്ഞിരിപ്പുണ്ട്.നിലവറ തുറക്കണമെന്നും തുറക്കരുതെന്നും പറഞ്ഞുകൊണ്ട് ആളുകൾ രണ്ടുപക്ഷം തിരിഞ്ഞിരിക്കുന്നു. എന്നാൽ എല്ലാ തീരുമാനങ്ങളെയും നിയന്ത്രിക്കാൻ കെല്പുള്ള ശക്തികൾ ചേരിതിരിഞ്ഞു കാത്തിരിപ്പുണ്ട്. ഇത് നന്മയും തിന്മയും തമ്മിലുള്ള പോരാട്ടമല്ല, തിന്മയും തിന്മയും തമ്മിലുള്ള പോരാട്ടമാണ്. രക്തച്ചൊരിച്ചിലും വൈരാഗ്യബുദ്ധിയും അധികാരഭ്രമവും അത്യാഗ്രഹവും ബുദ്ധിയെ ഭരിക്കാൻ തുടങ്ങുമ്പോൾ ലോകത്തെ അന്ധകാരം ഭരിക്കാൻ ആരംഭിക്കുന്നു.

സുപരിചിതമല്ലാത്ത അന്തരീക്ഷവും വ്യത്യസ്ത ലോകങ്ങളും സ്രൃഷ്ടിച്ചുകൊണ്ട്, വായനക്കാരെ ഭ്രമാത്മകമായ ഒരു സ്വപ്നത്തിലേക്കു നയിക്കുകയാണിവിടെ. പുറമെ കാണുന്നതിനപ്പുറമായി കണ്ണു മൂടിക്കൊണ്ട് അദൃശ്യമായി നമ്മെ ഭരിച്ചുകൊണ്ടിരിക്കുന്ന തിന്മ നിറഞ്ഞ ശക്തികൾ അന്ധകാരം നിറച്ചുകൊണ്ടേയിരിക്കുന്നു. ഒരേ സമയം പല ലോകങ്ങളിലൂടെ സഞ്ചരിച്ചുകൊണ്ട് വായനക്കാരൻ തിരികെയെത്തുന്നത് അവനവന്റെയുള്ളിലെ, കണ്ടെത്താതെ കിടക്കുന്ന ഇരുളിലേക്കാവാം.

ഉദ്യോഗജനകമായ സന്ദർഭങ്ങൾ നിറഞ്ഞ, ത്രില്ലറുകളോട് ആഭിമുഖ്യമുള്ളവർക്ക് തിരഞ്ഞെടുക്കാവുന്ന ഒരു മികച്ച രചനയാണ് അന്ധകാരം മാനവപർവ്വം. ഓരോ പേജിലും ആകാംക്ഷ നിറഞ്ഞ മുഹൂർത്തങ്ങൾ, അവിശ്വസനീയമായ സംഭവങ്ങൾ, തീരെ പ്രതീക്ഷിക്കാത്ത ട്വിസ്റ്റുകൾ, എന്നിവയൊക്കെ ഈ നോവലിന്റെ പ്രത്യേകതകളാണ്.