നിൻ അനുരാഗമിതെൻ സിരയിൽ (Nin Anuragamithen Sirayil)

ലെഫ്റ്റനന്റ് കമാൻഡർ ഗോപി കൃഷ്ണന്റെയും ഡോക്ടർ ഇഷയുടെയും മനോഹരമായ പ്രണയകഥ. പ്രണയം സ്വന്തമാക്കിയതിനുശേഷമുള്ള ജീവിതത്തിന്റെ പരുക്കൻ യാഥാർത്ഥ്യങ്ങളിലൂടെ കടന്നുപോകുന്നവർ, പ്രണയാനന്തരമെടുക്കുന്ന ഓരോ തീരുമാനവും ജീവിതഗതിയെ എങ്ങനെ സ്വാധീനിക്കുമെന്ന് ഈ നോവൽ പറഞ്ഞുവയ്ക്കുന്നു. വളരെ ആകസ്മികമായി ഒരു ട്രെയിൻ യാത്രയിൽ കണ്ടുമുട്ടുന്ന ഗോപി കൃഷ്ണനും ഇഷയും പ്രണയത്തിലാവുന്നു, തുടർന്ന് വിവാഹിതരാവുകയും സന്തോഷം നിറഞ്ഞ ഒരു ദാമ്പത്യജീവിതം നയിക്കുകയും ചെയ്യുന്നു. എന്നാൽ അവരുടെ ജീവിതത്തിൽ അഞ്ജലി എന്ന ഗോപിയുടെ സഹപ്രവർത്തകയുടെ സാന്നിധ്യം പ്രശ്നങ്ങൾ സൃഷ്ടിക്കാൻ ആരംഭിക്കുന്നു. പിന്നീട് നിരവധി അവിചാരിത സംഭവങ്ങളിലൂടെ നോവൽ കടന്നുപോകുന്നു.

പ്രണയവും വിരഹവും മനുഷ്യബന്ധങ്ങളുടെ സങ്കീർണ്ണതകളും ചർച്ച ചെയ്യുന്ന നോവൽ രാജ്യത്താകമാനം പടർന്നുപിടിച്ചിരിക്കുന്ന ഭിക്ഷാടനമാഭിയയുടെ പ്രവർത്തനങ്ങളെക്കുറിച്ചും പ്രതിപാദിക്കുന്നുണ്ട്. തിന്മ നിറഞ്ഞ ലോകമാണെങ്കിലും നന്മയുടെ അദൃശ്യമായ ചങ്ങലക്കണ്ണികൾ നമ്മിലൂടെ ചേർത്തുവയ്ക്കപ്പെടുന്നുണ്ടെന്ന് തെളിയിക്കുന്ന കൃതിയാണ് ‘നിൻ അനുരാഗമിതെൻ സിരയിൽ.’

പ്രണയം പ്രധാന ആശയമായി നോവലിൽ വർത്തിക്കുമ്പോഴും മറ്റു നിരവധി പ്രശ്നങ്ങളിലൂടെ ഈ നോവൽ കടന്നുപോകുന്നു. രണ്ടുപേർ തമ്മിലുള്ള സ്നേഹം നിലനിൽക്കണമെങ്കിൽ ഒരാളുടെ മാത്രം പരിശ്രമം മാത്രം മതിയാകില്ലെന്നും നിരന്തരമായ ആത്മപരിശോധനയും പരിഗണനയും പരസ്പരം മനസ്സിലാക്കാനുള്ള മനസ്സും ഇരുവർക്കും ആവശ്യമാണെന്നും ഊട്ടിയുറപ്പിക്കുന്നു.

വളരെ ലളിതമായ ഭാഷയിൽ, എന്നാൽ ആഴത്തിൽ സംവദിക്കുന്ന ആഖ്യാനശൈലിയാണ് നോവൽ പിന്തുടരുന്നത്. വായനക്കാരന് സ്വന്തമായി ചിന്തിക്കാനും അഭിപ്രായങ്ങൾ രൂപീകരിക്കാനുമുള്ള ഇടം എഴുത്തുകാരൻ നല്കുന്നുണ്ട്.

റൊമാൻസ് ഫിക്ഷൻ ഇഷ്ടപ്പെടുന്നവർ, കുടുംബ ബന്ധങ്ങളെ നെഞ്ചോടു ചേർക്കുന്നവർ, ഒറ്റയിരുപ്പിൽ വായിച്ചുതീർക്കാൻ ഇഷ്ടപ്പെടുന്നവർ – ഈ വിഭാഗങ്ങളിൽ ഉൾപ്പെടുന്ന വായനക്കാർക്ക് അനുയോജ്യമായ നോവലാണ് ‘നിൻ അനുരാഗമിതെൻ സിരയിൽ.’