ടാഗോർ ജീവിതത്തിലൂടെ (Tagore Jeevithathiloode)

രബീന്ദ്രനാഥ ടാഗോറിൻ്റെ ഒരു വരി കവിതയെങ്കിലുംമൂളാതെ, രബീന്ദ്രസംഗീതത്തിൻ്റെ മാസ്‌മരികത നുകരാതെ കൽക്കത്തയിലെ ഒരു പകലും അസ്‌തമിക്കുന്നില്ല. ഓരോ ബംഗാളിയുടെയും വികാരമാണ് ടാഗോർ. നൂറ്റിയൻപത് വർഷങ്ങൾക്ക് മുൻപു ജനിച്ച വ്യക്തിയായിട്ടും മൺമറഞ്ഞിട്ട് എൺപതു വർഷങ്ങളോളമായിട്ടും ആ ജീവിതവും രചനകളും ഇന്നും പഠിച്ചു കഴിഞ്ഞിട്ടില്ല. അത്രയേറെ സ്വാധീനം ചെലുത്തിയിട്ടുണ്ട് ടാഗോറെന്ന വാക്ക് ഇന്ത്യൻ മനസ്സിൽ. ഒരു ചട്ടക്കൂടിനകത്ത് തളച്ചിടാൻ കഴിയുന്ന വ്യക്തിത്വമായിരുന്നില്ല ടാഗോറിൻ്റേത്. സാഹിത്യലോകത്ത് ആ പ്രതിഭാശാലി കൈവയ്ക്കാത്ത മേഖലകളുണ്ടായിരുന്നില്ല. ജീവിതത്തിലാവട്ടെ അതിസങ്കീർണ്ണവും അസാധാരണവുമായ അനുഭവങ്ങൾ നേരിടേണ്ടിയും വന്നു.

ടാഗോറിനെക്കുറിച്ചുള്ള നിരവധി ജീവചരിത്രഗ്രന്ഥങ്ങൾ പുറത്തുവന്നിട്ടുണ്ട്. എന്നാൽ അതിൽ പലതിലും വിശദമായി ചർച്ച ചെയ്യാതെപോയ ചില സുപ്രധാന സംഭവങ്ങളെക്കുറിച്ചും ടാഗോറിൻ്റെ ജീവിതത്തിൽ ഏറെ സ്വാധീനം ചെലുത്തിയ ചില വ്യക്തികളെക്കുറിച്ചുമുള്ള പരാമർശങ്ങളാണ് ഈ ഗ്രന്ഥത്തിലുള്ളത്. സാഹിത്യലോകത്ത് നേട്ടങ്ങൾ ഒന്നൊന്നായി തേടിയെത്തുമ്പോഴും വ്യക്തിജീവിതത്തിൽ ദുരന്തങ്ങളാൽ വേട്ടയാടപ്പെട്ട ടാഗോറെന്ന നിസ്സഹായനായ മനുഷ്യനെ ഇവിടെ കാണാം. സഹിച്ച യാതനകളറിയാം. താണ്ടിയ ദൂരങ്ങൾ അളക്കാം. ടാഗോർകൃതികളിലൂടെയും ജീവചരിത്രഗ്രന്ഥങ്ങളിലൂടെയും സഞ്ചരിക്കുമ്പോൾ എവിടെയൊക്കെയോ ടാഗോറിൻ്റെ ജ്യേഷ്ഠപത്നി കാദംബരിയുണ്ട്. ടാഗോറിനെ സ്നേഹിക്കുന്നവരുടെ മനസ്സിലെന്നും
ഒരു നൊമ്പരമായി കുടിയേറിയ പേര്. ഒരു അസാമാന്യ പ്രതിഭാശാലിയുടെ പ്രതിഭ ബാല്യത്തിലേ തിരിച്ചറിഞ്ഞ മറ്റൊരു ജീനിയസായിരുന്നു കാദംബരി. ടാഗോറെന്ന ഒരു പിടി മണ്ണിനെ അവൾ ശില്പമാക്കി വാർത്തെടുത്തു. ചുറ്റുമുള്ളവരുടെ മൗനം കനത്തപ്പോൾ അതിൽ മനംനൊന്ത് മറ്റൊരു ലോകത്തേക്ക് പറന്നുപോയി. ആ ഹ്രസ്വജീവിതത്തിൻ്റെ കാണാപ്പുറങ്ങളിലേക്കൊരു യാത്ര കൂടിയാണീ പുസ്‌തകം.

ഏറ്റവും ലളിതമായും സരസമായും എഴുതിയിരിക്കുന്ന ജീവചരിത്രപുസ്തകം