പ്രണയകവിതകൾ (Pranayakavithakal)

പി. ഭാസ്‌കരൻ 1924 ഏപ്രിൽ 21-ന് കൊടുങ്ങല്ലൂരിൽ ജനിച്ചു. കവി, ചലച്ചിത്രഗാനരചയിതാവ്, സംവിധായകൻ, നിർമാതാവ് എന്നീ നിലകളിൽ പ്രശസ്തനായി. വിദ്യാർഥിയായിരിക്കുമ്പോൾതന്നെ ദേശീയപ്രസ്ഥാനത്തിലും പുരോഗമന രാഷ്ട്രീയപ്രസ്ഥാനത്തിലും സജീവമായി പങ്കുകൊണ്ടു. ക്വിറ്റ് ഇന്ത്യാ പ്രക്ഷോഭണവുമായി ബന്ധപ്പെട്ട് ജയിൽശിക്ഷയ്ക്കു വിധേയനാവുകയും കോളജ് വിദ്യാഭ്യാസം മുടങ്ങുകയും ചെയ്തു. ദേശാഭിമാനി, ജയകേരളം, ദീപിക എന്നിവയുടെ പത്രാധിപത്യം വഹിച്ചു. ആകാശവാണിയിലെ പ്രൊഡ്യൂസറായും കേരള സംഗീത നാടക അക്കാദമി ചെയർമാനായും ഫിലിം ഡവലപ്‌മെന്റ് കോർപറേഷൻ ചെയർമാനായും സേവനമനുഷ്ഠിച്ചിട്ടുണ്ട്. കമ്മ്യൂണിസ്റ്റ് അനുഭാവിയായിരുന്ന കാലത്ത് അദ്ദേഹം രചിച്ച വയലാർ ഗർജിക്കുന്നു എന്ന കൃതി മലയാളകവിതാരംഗത്തെ ഒരു പ്രധാന സംഭവംതന്നെയായി. കമ്മ്യൂണിസ്റ്റ് പ്രസ്ഥാനത്തിന്റെ വളർച്ചയ്ക്ക് സാഹിത്യസൃഷ്ടിയിലൂടെ വിലപ്പെട്ട സംഭാവനകൾ നല്കി. പില്ക്കാലത്ത് കമ്മ്യൂണിസ്റ്റ് പാർട്ടിയിൽനിന്ന് അകന്നു. ഓടക്കുഴലും ലാത്തിയും, വില്ലാളി, പാടുന്ന മൺതരികൾ, മുൾക്കിരീടം, സത്രത്തിൽ ഒരു രാത്രി, ഓർക്കുക വല്ലപ്പോഴും, ഒറ്റക്കമ്പിയുള്ള തംബുരു തുടങ്ങിയവയാണ് പ്രധാന കൃതികൾ. ഓടക്കുഴൽ അവാർഡ്, കേരളസാഹിത്യ അക്കാദമി അവാർഡ്, ഫെല്ലോഷിപ്പ് എന്നിവ ലഭിച്ചു. പ്രസിഡന്റിന്റെ വെള്ളിമെഡലിന് അർഹമായ നീലക്കുയിൽ, ഇരുട്ടിന്റെ ആത്മാവ്, ജഗദ്ഗുരു ആദിശങ്കരൻ തുടങ്ങിയ അനേകം ചിത്രങ്ങൾ സംവിധാനം ചെയ്തിട്ടുണ്ട്. മലയാള സിനിമയ്ക്കു നല്കിയ സംഭാവനകളെ മാനിച്ച് പ്രേംനസീർ പുരസ്‌കാരത്തിനും ജെ.സി. ഡാനിയൽ പുരസ്‌കാരത്തിനും അർഹനായി. ‘ഏഷ്യാനെറ്റ് സാറ്റലൈറ്റ് കമ്മ്യൂണിക്കേഷ’നിൽ ചെയർമാനും മാനേജിങ് ഡയറക്ടറും ആയി സേവനമനുഷ്ഠിച്ചിട്ടുണ്ട്. ‘സിംഫണി ലൈഫ് ടൈം അച്ചീവ്‌മെന്റ് അവാർഡ്-2006’ ആണ് അദ്ദേഹത്തിന് ഏറ്റവും ഒടുവിൽ കിട്ടിയ ബഹുമതി. 2007 ഫെബ്രുവരി 25-ന് നിര്യാതനായി.