DCBOOKS
Malayalam News Literature Website

പൊതുവിദ്യാലയങ്ങള്‍ അന്താരാഷ്ട്ര നിലവാരത്തിലേക്ക്

അടിസ്ഥാന സൗകര്യങ്ങള്‍ വികസിപ്പിക്കുന്നതോടൊപ്പം പഠനമികവിലൂടെ പൊതുവിദ്യാലയങ്ങള്‍ അന്താരാഷ്ട്ര നിലവാരത്തിലേക്ക് ഉയര്‍ത്താന്‍ തീരുമാനമായി. ഇതിനായി അക്കാദമിക് വര്‍ഷത്തില്‍ ചുരുങ്ങിയത് 200 പഠനദിനം ഉറപ്പാക്കാന്‍ മുഖ്യമന്ത്രി പിണറായി വിജയന്റെ അധ്യക്ഷതയില്‍ ചേര്‍ന്ന അവലോകനയോഗം തീരുമാനിച്ചു. പൊതുവിദ്യാഭ്യാസ സംരക്ഷണയജ്ഞം പ്രവര്‍ത്തനങ്ങള്‍ യോഗം വിലയിരുത്തി. 200 പഠനദിനവും ആയിരം പഠനമണിക്കൂറും വേണമെന്നാണ് പൊതുവായ തീരുമാനം.

അധ്യാപക പരിശീലനം കഴിവതും പ്രവൃത്തിദിനങ്ങളില്‍നിന്ന് ഒഴിവാക്കും. വിദ്യാഭ്യാസമേളകളും മറ്റും ശനിയാഴ്ചകൂടി ഉള്‍പ്പെടുത്തി നടത്തും. പഠനദിനങ്ങളിലോ പഠന സമയങ്ങളിലോ അധ്യാപകരെ മറ്റു ജോലിക്ക് നിയോഗിക്കരുതെന്ന് സ്ഥാപനമേധാവികളോട് നിര്‍ദേശിച്ചിട്ടുണ്ട്. ഈ ദിവസം കണക്കാക്കിയാണ് പുസ്തകങ്ങളിലെ ഉള്ളടക്കവും പഠനപ്രവര്‍ത്തനവും തയ്യാറാക്കിയത്. അടിസ്ഥാന സൗകര്യവികസനത്തിന് 138 വിദ്യാലയത്തിന്റെ വിശദമായ പദ്ധതിരേഖ കിഫ്ബിക്ക് സമര്‍പ്പിച്ചിട്ടുണ്ട്. ഇവയില്‍ 113 സ്‌കൂളിന് കിഫ്ബി സാമ്പത്തികാനുമതി നല്‍കി. ഇതുവഴി 565 കോടി രൂപയാണ് ലഭിക്കുക. 25 സ്‌കൂളിന് ഉടനെ അനുമതി പ്രതീക്ഷിക്കുന്നു. 117 സ്‌കൂളിന്റെ വിശദമായ പദ്ധതി റിപ്പോര്‍ട്ട് ഡിസംബറിനകം കിഫ്ബിക്ക് സമര്‍പ്പിക്കും. 2019 ജനുവരിയോടെ അടിസ്ഥാന സൗകര്യവികസനം പൂര്‍ത്തിയാക്കും.

 

Comments are closed.