DCBOOKS
Malayalam News Literature Website

പ്രേംജിയുടെ ജന്മവാര്‍ഷിക ദിനം


കവിയും നടനും സാമൂഹ്യപരിഷ്‌കര്‍ത്താവുമായിരുന്ന പ്രേംജി എന്ന എം.പി. ഭട്ടതിരിപ്പാട് 1908 സെപ്റ്റംബര്‍ 23ന് മലപ്പുറം ജില്ലയിലെ വന്നേരി ഗ്രാമത്തില്‍ മുല്ലമംഗലത്ത് ജനിച്ചു. പത്തൊന്‍പതാം വയസ്സില്‍ മംഗളോദയത്തില്‍ പ്രൂഫ് റീഡറായി. അക്കലത്തു നിഷിദ്ധമായിരുന്ന വിധവാവിവാഹം പ്രാവര്‍ത്തികമാക്കിക്കൊണ്ട് കുറിയേടത്തുനിന്നും വിധവയായ ആര്യ അന്തര്‍ജനത്തെ പ്രേംജി വിവാഹം ചെയ്തു.

വി.ടി.ഭട്ടതിരിപ്പാടിന്റെ ‘അടുക്കളയില്‍നിന്ന് അരങ്ങത്തേക്ക്’ എന്ന നാടകത്തിലൂടെ അഭിനയരംഗത്തെത്തിയ അദ്ദേഹം നിരവധി നാടകങ്ങളില്‍ അഭിനയിച്ചു. നാടകത്തിലെ അഭിനയ പരിചയം കൊണ്ട് ചലച്ചിത്രരംഗത്തേക്കും കടന്ന പ്രേംജി ‘മിന്നാമിനുങ്ങ്’, ‘തച്ചോളി ഒതേനന്‍’, ‘കുഞ്ഞാലി മരയ്ക്കാര്‍’, ‘ലിസ’,’യാഗം’, ‘ഉത്തരായനം’, ‘പിറവി’, ‘സിന്ദൂരച്ചെപ്പ്’ തുടങ്ങിയ 60 ഓളം ചിത്രങ്ങളിലും വേഷമിട്ടു. ‘സപത്‌നി’,’ നാല്‍ക്കാലികള്‍’, ‘രക്തസന്ദേശം’, ‘പ്രേംജി പാടുന്നു’ എന്നീ കാവ്യസമാഹാരങ്ങളും ‘ഋതുമതി’ എന്ന നാടകവും രചിച്ചിട്ടുണ്ട്.

ഷാജി എന്‍. കരുണ്‍ സംവിധാനം ചെയ്തത പിറവിയിലെ ചാക്യാര്‍ എന്ന കഥാപാത്രത്തെ അനശ്വരമാക്കിയതിന് അദ്ദേഹത്തിന് 1988ല്‍ മികച്ച നടനുള്ള ഭരത് അവാര്‍ഡും സംസ്ഥാന ഗവണ്മെന്റ് അവാര്‍ഡും ലഭിച്ചു. 1977ല്‍ കേരള സാഹിത്യ അക്കാദമി ഫെലോഷിപ്പ് ലഭിച്ച അദ്ദേഹത്തിന് കേരളസംഗീത നാടക അക്കാദമി ഫെല്ലോഷിപ്പും ലഭിച്ചിട്ടുണ്ട്. 1998 ഓഗസ്റ്റ് 10ന് അദ്ദേഹം അന്തരിച്ചു.

 

Comments are closed.