‘വുമണ്‍ ഇന്‍ സിനിമ കളക്റ്റീവിന്’ പിന്തുണയുമായി നടന്‍ പൃഥ്വിരാജ്

prv

ചലച്ചിത്ര മേഖലയില്‍ പുതുതായി രൂപീകരിച്ച വനിതകളുടെ സംഘടനയ്ക്ക് പിന്തുണയുമായ് നടന്‍ പൃഥ്വിരാജ്. വനിതാ കൂട്ടായ്മയായ വുമണ്‍ ഇന്‍ സിനിമ കളക്റ്റീവിന്റെ കൂടെ നില്‍ക്കുന്നത് ഒരു ബഹുമതിയായാണ് താന്‍ കാണുന്നതെന്ന് പൃഥ്വിരാജ് തന്റെ ഫേസ്ബുക്കില്‍ കുറിച്ചു.

‘മലയാള സിനിമയിലെ സ്ത്രീ കൂട്ടായ്മയായ വുമണ്‍ ഇന്‍ സിനിമ കളക്റ്റീവിന്റെ കൂടെ നില്‍ക്കുന്നത് ഒരു ബഹുമതിയായികാണുമെന്നും എല്ലായ്‌പ്പോഴും ഒപ്പമുണ്ടാകു’മെന്നുമാണ് താരം പോസ്റ്റിലൂടെ പറയുന്നത്.

pr.fb

നേരത്തെ കൊച്ചിയില്‍ യുവ നടി അക്രമിക്കപ്പെട്ടപ്പോഴും ശ്രദ്ധേയമായ നിലപാട് സ്വീകരിച്ചതാരമായിരുന്നു പൃഥ്വിരാജ്.

മഞ്ജു വാര്യര്‍, ബീനാ പോള്‍, പാര്‍വതി, വിധു വിന്‍സെന്റ്, റിമാ കല്ലിങ്കല്‍, സജിതാ മഠത്തില്‍ എന്നിവരുടെ നേതൃത്വത്തിലാണ് സംഘടന രൂപീകരിച്ചത്. ചലച്ചിത്ര മേഖലയിലുള്ള സ്ത്രീകളുടെ പ്രശ്‌നങ്ങള്‍ അടുത്തറിയുന്നതിനും ചര്‍ച്ച ചെയ്യുന്നതിനുമായാണ് സംഘടന രൂപീകരിച്ചിരിക്കുന്നത്. ഇന്ത്യയില്‍ തന്നെ ചലച്ചിത്രമേഖലയില്‍ ഒരു വനിതാ സംഘടന രൂപപ്പെടുന്നത് ഇതാദ്യമാണ്. നിലവില്‍ ചലച്ചിത്ര മേഖലയിലുള്ള വിവിധ സംഘടനകളിലെ വനിതകള്‍ക്ക് ഈ സംഘടനയുടെ ഭാഗമാകാം. അമ്മ, ഫെഫ്കാ എന്നീ സംഘടനകള്‍ക്ക് ബദല്‍ അല്ല ഈ സംഘടനയെന്നും സ്ത്രീ പ്രശ്‌നങ്ങള്‍ക്ക് പ്രാഥമിക പരിഗണന എന്ന ലക്ഷ്യത്തിലൂന്നിയാണ് സംഘടനയെന്നും നേതൃത്വം വ്യക്തമാക്കുന്നു.

 

Categories: MOVIES